دمعة عيد
شو جابك ياعيد لعنا…
لتزيد الوجع!! والهم آكلنا..
جايي من زمان بعيد
كنا فيك نتهنا
كانت الفرحة فيك عم بتزيد
ونزين طرقات حارتنا
وتكبر الفرحة بهدايا العيد
والخير يزيد بِ غلتنا
لو تعرف ياعيد… وانت بعيد
شو صار وجرى بحالتنا…
الغلا شلع بقوة…
غصون شجرتنا
ودموع أطفال غرقت بغصتنا
لا قدرنا نرسم الفرحة بهالعيد
ولا في نار ولعت بموقدنا..
وللأحباب لكنت تجمعهن ياهلعيد
الدروب ماعادت توصلنا
صرنا متل ورقة بمهب الريح..
مامنعرف بعد شو ناطرنا
خليك ياعيد عنا بعيد..
لا تزيد دخلك مواجعنا
حتى نرحب فيك..
ماقدرنا..
ولا فرحة فيك جمعتنا
وإذا حبيت تغير مواعيد
وترجع السلام لموطنا
عاصفة من جذورها تشيل
اصنام عم تحرق موطنا
متل الحلم … الفرح من قلوبهم. تشيل… وتحملها الرياح وتجيبها.. لعنا…
وتشعشع الأنوار…بليل عتمتنا
نجاح ذبيان
خاصية التعليق غير مفعلة - يمكنك المشاركة على مواقع التواصل الاجتماعي