[ دنيـا سـواقي ]
بقلم: مروان مكرم
الدنيا سواقي.. ونار وحطاب
ووجوه بتداري فـ وش كداب
الكل في حضرة خوفه “دواب”
مربوطة فـ ساقية..
والروح محراقة..
بتعافر في تراب الميري
والسيد فينا.. عبد لغيري
يا خوفي يا قلبي من “تفكيري”
لا يبيعني بلاش!
فمتستناش..
تغزل من جرحك توب عِزّة
الأرض في عين الواهم “هزّة”
والحق في إيد الجاني “مَزّة”
يسكر بـ دماك..
ما هو اللي رماك..
في جحور الناس “نملة” وحيدة
خلاك تزرع.. والغير إيده..
تحصد في غلالك وتجني ده..
وتقيدك “آه”
آه يا ابن لذا..
يا “نقطة” في بحر ملوش آخر
العبد يموت.. والظلم فـاخر
واقف عـ الشط بيتنخر..
في عضم الغلابة
افتح عينك..
شِد الستارة على المشهد
الكل في حفل الموت يشهد
إنك “تراب”..
تلاقيك في الدنيا.. ولا جيتش!
يا ساقية بتطحن في الأيام
وتفوتنا جثث.. أو أوهام
لا الظلم شبع.. ولا نِمنا سلام
والفجر.. غباش!
وعجبي !
#مروان_مكرم
