الناقد والفنان التشكيلي والموجه العام للتربية الفنية؛ ناصر أحمد سليم.
حاصل على مجموعة من الجوائز القيمة من جمهورية مصر، وعدة دول عربية ومن أوربا وجنوب آسيا.
1985 – حصل على بكالوريوس التربية الفنية من جامعة حلوان.
1986 – شارك في الخدمة الوطنية بقوات الدفاع الجوي للجمهورية المصرية، وفي نفس السنة أنجز مجموعة من الجداريات بسيناء.
1987- اشتغل معلم بالهيئة الملكية للجبيل وينبع بالسعودية.
1988 – تدرج في الوظيفة من مرتبة معلم إلى كبير المعلمين.
2021 – اشتغل خلال هذه الفترة مابين التدريس والتربية الفنية، إلى أن تعين موجه العام للتربية الفنية لمحافظة القاهرة.
تم تكليفه من طرف وزارة التربية والتعليم الفني بتحكيم المراكز الفنية الصيفية.
1994 – إعارة ليشتغل مدرس للتربية الفنية بوزارة التعليم في سلطنة عمان.
*** 1987 منذ هذه السنة، عضو عامل بنقابقة الفنانين التشكليين وحتى الآن.
*** عضو بالجمعية الأهلية للفنون الجميلة.
***عضو بجمعية أصالة للفنون التراثية والمعاصرية.
شارك في العديد من المعارض الجماعية والتي وصلت سبعين، داخل وخارج أرض الوطن.
كما أقام عدة معارض فردية آخرها سنة 2022 بمتحف احمد شوقي بالجزيرة.
ملاحظة؛ حاليا يعد لمعرض لجديد ابداعاته، عن الحياة المعيشية على ضفاف نهر النيل.
من هنا كان لمجلة ازهار الحرف المصرية الإلكترونية ،السبق في إجراء هذا الحوار معه، لنبحر في عوالمه المتعددة في النحت والرسم وكتابة كتب الأطفال.
حاوره من المغرب؛ محمد زوهر
١) في البداية تحدث لنا عن طفولتك وكيف امضيتها مع الفن التشكيلي…؟
ج)؛ امي الله يرحمها هي اللي اكتشفت الموهبه من قبل حتى ما اروح رياض الاطفال وكنت بشخبط وبحفر في الحيطان بتاعه البيت وكانت هي بتسيبني اعمل اللي انا عايزه كله وكنت بعمل اشكال من المكعبات كبيره
٢) انت حاصل على بكالوريوس التربية الفنية من جامعة حلوان، ماذا يعني لك هذا التكوين… ؟ وهل درست تاريخ الفن… ؟
ج)؛ الحمد لله انا درست في كليه التربيه الفنيه طبعا كليه التربيه الفنيه فيها الدراسه خمس سنوات لسنه الاولى بتبقى سنه اعدادي بندرس فيها جميع التخصصات نحت وخزف رسم وتصوير تصميم وطباعه ونسيج واشغال معادن واشغال خشب واشغال جلد وطبعا الى جانب الدراسات في تاريخ الفن ودراسات في التربيه بالنسبه لدراسه في تاريخ الفن طبعا هي كانت الاساس اللي عرفني بالفنون القديمه والحديثه الفني المصري القديم والفن البابلي والفن الاشوري وفنون شمال افريقيا وغرب شمال افريقيا وفنون الغرب
٣) في سنة 1986 قمت بإنجاز بعض الجداريات في سيناء تحدث لنا عن ذلك…؟
ج)؛ الجدريات اللي رسمتها في سيناء كانت عباره عن منظر لواحه وسط الصحراء لان احنا قضينا فتره في الريف قبل ما ننتقل الى الصحراء فالحياه في الصحراء بتبقى صعبه شويه الجداريه عليها واحه تفكرنا بالايام الجميله اللي هي كانت وسط الخضره والبحر والميه والجمال ده كله وفي جداريه تانيه رسمتها عن النيل المراكب الشرعيه اللي هي بتتحرك من بالهواء والمناظر الجميله بتاعتها وكان مساحه اللوحه متر ونص في 3 م ونص يعني مساحه كبيره وبعد كده هو في بقى مجموعه من الرسومات الزخرفيه زي الفراشات والورد وبعض العبارات بالخط يعني عموما يعني سواء كان خط عربي او خط افرنجي المهم ان المكان كله جدرانه اتزينت واخذت عليه اعظم هديه كانت مصحف من قائد الكتيبه وهو اللي طلب ان ناخذ صوره مع سيادته وبناء على هذه الصور والحاجات المعموله على الجدران دي قدمتها لنقابه الفنيه التشكيليين فقبلت فيها كعضو عامل من منذ 1987 لغايه الان
٤)لقد اشتغلت بين التدريس والتربية الفنية إلى أن وصلت منصب الموجه العام للتربية الفنية، تحدث لنا عن هذا المسار الطويل، كيف قضيته بين التدريس والتربية الفنية والتوجيه الفني … ؟
ج)؛ اشتغلت مدرس تربيه فنيه 1988 ويعني ابتدا المشوار في المدارس الاعدادي والخبره الحقيقيه للمدرس يعني بعد الكليه هي الميدان العملي فمش بس بتستفيد ان انت بتطلع خبرتك للطلبه في مجال التربيه الفنيه انما بتتعلم جميع الامور الاداريه الخاصه بالمؤسسه التعليميه المدرسه بحالها لان طبعا انت بتقيم الطلبه بدرجات فالدرجات دي بتتجمع مع درجات المواد الثانيه يبقى في كنترول اشتغلت في الكنترول اخذت خبره بعد كده انتقلت الى المرحله الثانوي بناء على رغبه قياده التوجيه في الاداره واشتغلت في الثانوي مده خمس سنوات وكان فعلا الطلاب بيشجعوني اني اطلع كل الخبره اللي عندي لان هم كانوا بيعملوا اعمال فعلا لا تقل عن اعمال طلبه الكليات الفنيه وكانوا متفهمين معاني الجمال والاساليب الفنيه المتنوعه من ناحيه النسيج للطاعه تاريخ الفن برده كله كان يعني في حماس وبين الطلاب شديده فكنت حريص على ان انا اقدم لهم كل جديد وهم كانوا بيتلقوا هذا العلم بالشكر وتسجيع الجميل بعد كده انتقلت الى العمل في التوجيه في الاداره التعليميه فاصبحت مشرف على المدارس الابتدائيه الى جانب المدارس الاعداديه وطبعا ده نوع جديد من الخبره لان مدرسين التربيه الفنيه في المرحله الابتدائي هم اصلا خريجي دبلوم معلمين وليس كليه فنيه في دبلوم المعلمين بيدرسوا التخصص اللي هم بيختاروه سواء لغه عربيه او رياضيات او علوم ولكن بياخدوا ماده اضافيه من المواد الانشطه الموجوده بيختار منها حاجه اما يختار زراعه او افطار رياضه او التربيه رياضيه او يختار رسم او يختار موسيقى فبياخد يعني حصص عن هذا الكلام لغايه ما بيحصل على الدبلوم بتاعه وبيبقى معروف ان هو الى جانب التخصص بتاعه واخد ماده يدرسها زي التربيه الفنيه او الموسيقيه او التربيه الرياضيه او الموسيقى او كده بتكون خبره المدرسين في المرحله الابتدائي ضعيفه من ناحيه فهم الفن او فهم طبيعه الطفل الحساسه اللي هي محتاجه تعامل برفق شديد جدا عشان الطالب ما يخافش من الماده ويتشجع ويرسم وكده فلذلك كنت قبل ما امارس الشغل في المدارس كما ينبغي كنت بحاول ان انا اعمل صداقه بيني وبين المدرسين عشان يطمنوا لكلامي ان انا مش رئيس ومرؤوس
٥)تم تكليفك من طرف وزارة التربية والتعليم بمهمة التحكيم، كيف كان يكون هذا التحكيم… ؟ وكيف كنت تشعر بهذه المسؤولية… ؟
ج)؛ تم التحكيم في المراكز الصيفيه على مستوى الجمهوريه طبعا دي المدارس بتشمل ابتدائي واعدادي وثانوي وهي في فتره الصيفيه في شهر اغسطس التحكيم انما بدايه العمل بالنسبه للمراكز بيبقى من بدايه شهر 6 لغايه نهايه شهر 8 هذا التحكيم نشوف الاعمال الفنيه الطالب فعلا هو اللي فكر في موضوعها هو اللي فكر في الخامه جهز الخامه بتاعته بمعرفته هو شخصيا رسم العمل بايده بدون تدخل من اي مشرف موجود في المركز وبناء عليه طبعا بيبقى فيه مركز اول ومركز ثاني ومركز ثالث على مستوى المحافظات اللي احنا بنحكمها وطبعا عمليه التحكيم دي بينت لينا حاجات فعلا استمتعنا بها لان لما بنتكلم مع الطالب ان نقول له انت مش اللي عامل الشغل ده يقول لا انا اللي عامله طيب عملته ازاي يذكر الخامه ويذكر تحضيرها ويذكر حفظها ويذكر تشكيلها كل حاجه عنها بيتكلم بحماس فبيبان طبعا انه فعلا شغله هو اللي تعب فيه اللي بيدافع عنه ومش منقول من شغل ثاني او مش مقلد شغل حد اكبر منه وهكذا يعني فكانت بتبقى فتره صحيح فيها مجهود كبير في السفر وفي التنقل بين المحافظات لكن بتبقى فتره مثمره فيها تعارف وصداقات فعلا انا انتهت مده خدمتي صحيح من سنوات ولكن لازلت على صله بالاصدقاء اللي في المحافظات لان هم فعلا يستحقوا الاحترام والتقدير
٦)عرفنا بالفن التشكيلي المصري المعاصر الحالي…؟ وهل تبشر الاسماء الحالية بمستقبل فني زاهر… ؟
ج)؛ الفن المصري المعاصر فن مبشر بالخير الفنانين دارسين وعددهم اصبح كبير جدا بسبب تخرجهم من عدد كبير من الكليات الفنيه التي انشات الفنون التطبيقيه والتربيه الفنيه اصبحت مش بس في القاهره بل في المحافظات في كليه التربيه النوعيه في كليات الفنون الجميله برده في المحافظات فعدد الخريجين اصبح كبير جدا وعلى درايه كبيره بالفن والاسماء كثير لدرجه انها يعني صعب ان انت تذكر حد هتذكر حد وهتنسى حد هيبقى فيها زعل انما الخريجين كثيرين كثير جدا وفي كافه المجالات الرسم والتصوير النحت والخزف الطباعه والنسيج وفنون الفيديو فنون التجهيز في الفراغ اعمالهم كثيره وجميله ومبشره بالخير ان شاء الله
٧)هل ترى ان الفن التشكيلي المعاصر، أعطى أساليب جديدة للفن العالمي…؟
ج) : اكيد الفن المعاصر عند نتائج كثيره جديده في الفن العالمي الرؤيه اصبحت تختلف عن قبل واصبح الفن يعني عالم لا تستطيع ان تتوقع ما سيحدث او ماذا سيقدم الفنان في كل معرض جديد بيعمله لان الفنون الحديثه مش بس الفنان بيعتمد على الدراسه الاكاديميه من تشريح لفهم لطبيعه الالوان والخامات والمدارس الفنيه والكلام ده انما هو الفنان بيتفاعل مع الكون كله فما تقدرش تتوقع هو ممكن يطلع ايه طبعا الفن المعاصر اسرالفن العالمي بشكل اكيد
٨) كيف تقرأ لنا تجربتك الفنية والمسرات التي مررت منها…؟ وهل لك اسلوب فني يميزك عن سواك…؟
ج)؛ في المسيره الفنيه بتاعتي انا اشتغلت جميع الاساليب المعروفه من الفنون الشعبيه للفن المصري القديم والفن القبطي والفن الاسلامي حتى فنون الغرب وكل ده كنت بحاول اشوف اكثر اسلوب هرتاح له واذكر الفنان عبد الهادي الوشاحي رئيس قسم النحت في كليه جميله اما حضر في الحديقه الثقافيه في السيده زينب وشاف شغلي المتنوع بين الحاجات اللي انا قلتها دي فقال لي يعني كن انت يعني خليك ناصر انت اختار الاسلوب اللي انت بتحبه اثبت عليه ففعلا لقيت نفسي بحب الفنون اللي هي فيها اشكال وحروف وبعمل بينهم علاقات سواء كان بالابيض والاسود او بالالوان فطلعت نتائج طبعا متميزه دي بشهاده الزملاء والحمد لله رب العالمين الانتاج بتاعي اخر حاجه يباع في امستردام
٩) انت نحات ورسام وكاتب كتب الأطفال وناقد، تحدث لنا عن ذلك…؟ وماهو المجال الذي يعجبك أكثر من الاخر…؟
ج)؛ كل المجالات اللي حضرتك ذكرتها دي تعجبني الرسم والنحت وقصص الاطفال والنقد الفني كلها يعني زي مجموعه فواكه ما تقدرش تقول ايه احلى من ايه انا بحبهم كلهم وبالنسبه لي بدايتي الحقيقيه يعني كانت فيه فن النحت انما نظرا لصعوبه المكان بالنسبه لي عشان غير مناسب لانتاج النحت يعني فاتجهت للرسم وطبعا النقد الفني اصبح ميسر باستخدام الموبايل فانما قصص الاطفال بكتب القصص اللي انا عايزها
١٠، من هو ناصر أحمد سليم الناقد، وهل لك بعض الكتابات النقدية والتي تحولت إلى إصدارات ورقية… ؟
ج) : ناصر احمد سليم هو معلم في المقام الاول ومشواري في التعليم كان مزدوج تربيه فنيه تربيه دي شق وفنيه الشق الثاني والشقين بيكملوا بعض وطبعا الطلاب هم اللي كانوا فعلا اهم حاجه في حياتي وكنت بقدم لهم فنون متنوعه وهم كانوا بيقدموا لاعمال مبدعه جميله والمسيره على مدار اكثر من 35 سنه وكنت عامل حساب اليوم اللي انا هوصل فيه لسن القانوني اللي هو التقاعد ولذلك كنت بشارك في المعارض على مستوى الدوله والمعارض في الجمعيات الفنيه وكنت بستنى يوم التقاعد ده بفارغ الصبر عشان اتفرغ تماما لفني وبفضل الله بعد التقاعد حصلت على منحه من المجلس الاعلى للثقافه وده سنه 22 23 وفي نفس العام 2022 اقمت المعرض الفردي الخاص بتاعي في متحف احمد شوقي وبالنسبه للنقد الفني يعني انا بقدمه كخدمه اصلا لاصدقائي وزملائي لان انا اتمكن من زياره المعارض المتنوعه في القاهره بسهوله بفضل الله لكن معظم اصدقائي ساكنين في اماكن بعيده فبيشوفوا النقد على الميديا وده بيسعدني ردود الافعال زائد اني برده استطعت ان انا اكون صداقات جديده وكثيره داخل وخارج مصر وبفضل الله رب العالمين انت محمد زهير شخص مهم جدا اسعدتني بصداقتك واود انها تدوم الى الابد وشكرا
١١) انت حاصل على مجموعة من الجوائز من عدة دول، ماذا يعني لك كل هذا التتويج… ؟
ج) : التقدير من عده دول ده معناه السلام لان الهدف الرئيسي من الفن المحترم الجاد هو السلام نشر السلام نشر الحب نشر الصداقه بين الشعوب كل الشعوب تحب السلام والفن هو رساله سلام
١٢) تحدث لنا عن المعرض الذي تستعد لتنظيمه عن حياة النيل… ؟
ج)؛ المعرض اللي انا بجهز له في الوقت الحالي الحياه على ضفاف النيل ممتد من صعيد مصر حتى شمالها وعلى ضفاف النيل توجد مدن وقرى يمكن معظم الناس يظنوا ان الحياه المدنيه الراقيه تكون في العاصمه ولكن بعد تجربه التحكيم على مستوى الجمهوريه ان التحضر والتمدن الحقيقيين فعلا في جميع محافظات مصر والتطور مستمر وقد يتفوق بعض ابناء المحافظات في تقديم افكار وفنون في غايه الجمال والرقه
١٣) لقد نظمت عدة معارض فردية، ماهي الرسائل الفنية التي كنت توجهها للمتلقي… ؟ وماهو الفرق بين المعارض الفردية و الجماعية…؟
ج)؛ المعرض الفردي الرساله اللي انا كنت دايما بحاول اني اؤكد عليها هي رساله الجمال اخلي عينك تشوف الجمال لان العين الفنان مدربه على انها تشوف الجمال وتقدمه للناس الاشخاص العاديين بيمروا على الجمال ومش بينتبهوا ليه نهائي الا ان الفنان كانه بيوقف الزمن لحظه قدام الجمال وبيسجلها في لوحته او في تمثاله او في عمله الفني او حتى في قصيدته او في قصته او في اي اداء سواء تمثيل او غناء المهم ان فعلا بركز على الجمال ولله الحمد بلاقي رد الفعل اللي عند الناس طيب وبكون سعيد جدا لما بحس انهم فهموا ان انا بكلم في الجمال في طبعا اساليب ثانيه كثير في الفن انا بحترمها وكل حاجه لكن انا مش بعمل غير اللي بحبه اما بالنسبه للمعارض الجماعيه والفرق بينها بين المعارض الفرديه المعارض الجماعيه بتبقى ما تقدرش تقيم فيها اسلوب فنان من الفنانين بشكل دقيق ليه لان الفنان بيقدم لوحه او لوحتين او عمل فني او عملين يعني عشان العدد ممكن يتجاوز 100 فنان او 150 فنان في قاعات مش هتستحمل اكثر من كده انما في المعرض الفردي بتقدر تقيم مستوى الفنان وبتعرف اتجاهه وبتعرف فكره ماشي ازاي لذلك جيت في الفتره الاخيره وفضلت ان انا احط كل مجهودي فيه المعرض الفردي هو صحيح بيتاخر شويه يعني ممكن المعارض الجمعيه بتعرض في خلال العام مره واثنين او اكثر او كل عام انما في المعرض الفردي ممكن تتاخر عام او اثنين او ثلاثه لغايه ما المعرض بتاعك بيطلع تبقى راضي عنه
١٤) مارأيك بالملتقيات الأدبية والفنية لاسيما ملتقى الشعراء العرب ومجلة ازهار الحرف اللتان يرأسهما الأديب والناقد والشاعر ناصر رمضان عبد الحميد… ؟
ج)؛ الملتقيات الثقافيه هي اللي بتشكل الفكر المستنير للفنان ايا كان توجه تشكيلي موسيقي روائي شاعر كل الفنون لا تستطيع ان تستغنى عن الملتقيات الادبيه والفنيه الجزء الثقافي وبالنسبه للازهار الحرف يعني هي حاجه جميله واعجبتني جدا واشكرك على ان انت اللي عرفتني بيها يا استاذ محمد زهير
١٥) اخيرا، ماهو الحلم الذي لايزال يسكنك كفنان تشكيلي وكناقد وككاتب كتب الأطفال…؟ وكيف تحب أن يتذكر الوسط الثقافي والمؤسساتي والذاكرة الفنية التاريخية المصرية… ؟
ج) :الحلم العربي من الخليج للمحيط، ونعيش في سلام ، ونفرح بأولادنا وأحفادنا ، ونشر الجمال بكل مكان .
حاوره من المغرب؛ محمد زوهر
