الصح بقى شبه الغلط
و ناس كتير سايقة العبط
و كلامها بقى زي الزلط
و حروفه مش شايلة النقط
صعب تلاقيه جوا القاموس
الحلم ليه اصبح كابوس
و الكل بقى همة الفلوس
و الحقد بقى طبع النفوس
نفوس كتير مليانه غل
مهما تراعيهم مالهومش حل
و الرد يبقى أصل و فصل
كله كلام و لا مره فعل
و بيوعدك وعود فشوش
وقت السداد مابتلقاهوش
لو فاضي جيبك ماتلزموش
ناس عايشه بتبدل وشوش
ماحدش يوم بيتغير
و بيقولوا ان انا مقصر
مافيش معروف بيتقدر
دا خلق عاوز تتفلتر
راح فين كلامنا المحترم
كان كل كلمة بتتفهم
مكتوب ف ورقة بالقلم
بالعربي دا مش بالعجم
في حاجات كتير اتغيرت
و أحلام كتير إتأجلت
حتى الهدوم اتقطعت
و موضة زمان اتبدلت
و الناس كمان ذوقها هبط
الأصلي و العيرة اختلط
خير الامور ما بقاش وسط
و الصح بقى شبه الغلط
كلمات
سعيد عبدالله
مصر ▪︎ 🇪🇬
