أغنية ثالثة من كنزي الذي كان مطويّا في
جيب دفتري
اشتقتلّك
منى رفيق بولس
لبنان
اشتقتلّك يا غايب عنّي
وشوقي أكبر من كلماتي
موج عيونك عم يندهني
ينام ويوعا عا صفحاتي
ولمّا صوتي بيصرخ وينك
دمع حروفي بيبقى أزغر
من دمعي الساكن جوّاتي
لمّا بتبعد بيناديني
جوع لوجّك جوع لعينك
شمسك حدّي بتدفّيني
تصحّي النّار ال بيني وبينك
برد الوحده مغلغل فيّي
يرسم بالعتمة عَينيّي
ولمّا صوتي بيصرخ وينك
دمع حروفي بيبقى أزغر
من دمعي الساكن جوّاتي
بحلم ليلة شوفك قربي
غمّض عيني عا بسماتك
صوت وجودك يمحي الغربة
يزرع فرحة من نغماتك
سكون الليل بيطلب منّي
دقّة قلبي تطير تغنّي
ولمّا صوتي بيصرخ وينك
دمع حروفي بيبقى أزغر
من دمعي الساكن جوّاتي
منى رفيق بولس
