آسفه نسيت..
لزقت قلبي فـ رد ع الشاشة
بعتت صُحبة ورد ..وقرنفل
وسؤال بيهز فـ كتافي بـ صمت
وسطر منسوخ للجميع..
من جبر خاطر واختصار للوقت
وحساب بيقفل بابه في عينيّ
لكنه فاتح للأمل شبّاك
فيااارب ..
نفسي اموت وادخل الجنّة ..
وقالولي لأ..الجنة ليها شروط
وانتي وخيالك والشعر ..
كـ موروستان..
والجنّة عُقلا ..
ما يجوزش،فيها جنان
يارب اعمل ايه ..
ما انا غصب عني نسيت؟
وفتحت فتحة فـ حيطة الحواديت
وقفلت عيني واغتصبت النوم
(الجِنس ) فكرة تروادني عن نفسي
و(العشق)قوت الغلابة واللي عاش محروم
سيبك من التفاصيل يا مبيّت النيّة
انا قد اكبر جبل وقت امّا تتأزّم
تتهد اسواري من لفظ حنيّة
ساعتها باضعف قوي
واسيبني للمجازات
ولشهقة البدايات..
من يوم ما ابن الهوي..
نط في بلاكونتي..
سحب ستارة الخجل ..
واتعرّي جوايّا..
ساعة ما فاح وردي ..
في طينُه واحضانه..
وازاي نشيد الشوق..
بيمتطي الرغبة ..وبنتعزف سوولو
وكأن جسمي (حرم )
وانا بنت مش (كعبة)
بتفسّر الاشواط علي مذهب الفطرة
فـ باسيب لجسمي الارض..
وتاخدني روحي واطير
«حالة انسلاخ وقتي ..من زنزانات الكبت »
بنكهة التوهان ..
تشبه لحد ما مزيج من الفودكا مع عرق توت احمر
مخلوط بطعم الدمع..في حنجرة روحي
يا كركبات الذات ..
ساعة ما بانتعني من بطن تخريفي
ساعة ما بامنعني علي عتبة التجربة
كل ال..(يجوز) ممنوع
وانا العنيدة قصاد ..صهللات الخوف
باسكت كتير جدا ..وباذاكر المحذوف
وعندي شرح قبيح..لاغاثة الملهوف..
وباعرف اتخيّل..
دخلت من غير إحم حلمك وشفت حاجات
ويومين في حضنك ابات..
انا و عَيَاك فـ نقار
وشفت عز الصبح الدنيا بتليّل
وباقارن المسافات..
وبافسّر الاشعار..
ولحدك انت بـ ألوص مالقيتش ولا تفسير
وانا اللي باطلع سلالم روحي قاطعة النَفس
ويرن قلبي الجرس.. اسمع وما افتحشي
كان نفسى جدا اكون ..
زي فوني التاتش
واعمل بروفة موت كل ما افصل شحن
وابعت رسالة لحد ..
واقول له اسفه نسيت
لزقت قلبي فـ رد ع الشاشة
وبعتت صُحبة ورد وقرنفل
وسؤال بيهز في كتافي بـ صمممت
..
دلوقت عايزة القلب والورد وسؤالي
ومش هانسي تاني وقل لي
(هو انت عامل ايه؟؟؟؟).
……………………………………..
عفاف التركي

قصيدة ..موروستان.