ما حدا بيعرف؟؟؟

ما حدا بيعرف!!!

ما حدا بْيَعرِف بالقلب شو فيه…
يِمكن جَنايِن وَرد، فِلّ وْغار،
وحقول بَيْضا بِالمحبِّة غمار…
خِدمِة وْوَفا لِلْغَيْر بِتْعَبّيْه،
والتّضحِيِة تْقَصّر مِنِ الأعمار…
وأوقات بِيْنِزّ وبِيْعَشّش فيْه
حِقد وْجَفا، وِالكِره يِشعِل نار…
وقلب احتَرَق شو عاد رَح يِشفيه
بَس يِنجرِح، الِجْروح صاروا كتار!
غَصّة ووَجَع مِن فِرقِة الأحباب،
ودموع تِنزُف مِن صَدى الأشْعار!

ما حدا بْيَعرِف بالفِكر شو فيه…
يِمكِن يْنَقّط وَرد عالأفكار،
وأحلام تِتْمَرجَح لَيل ونْهار…
حِلْم السّفر والحُبّ ما بْيِكْفيه
عَربَش على أحلام غَيْرُه وطار!
كِتْر الحَكي عالنّاس بِيْسَلّيْه
فَرحَة بِقَلبُه يِنقُل الأخبار!
وفي ناس فِكرا بالطّمَع قَهّار!
وبِجياب عُمرُه بِخلُه بِيْخَبّيْه…
بْطَعنِة غَدر بِيْفور، بِتخَلّيْه
ثورِةْ غَضَب عالظّلم يا سِتّار!

ما حدا بيعرف هالعمر شو فيه…
حَلّي القلب خبّي بقلبو سرار
والفكر صفّي وبالمحبّة كْبار!

زينة شعاع 🌷💕🌹
لبنان 🇱🇧