جلسة مساج
…..
وانا لما بستناك
هناك ..
في وقت شمس مجمعة
كل الأشعة مسلطاها
ع الدماغ ..
وبحرك الدبلة في صباعي
اللي عشان زعلك سايبها
وبعتبرها
أغلى عندي من آلاف
قطع المصاغ ..
وبحس نشفان ريقي م الحر القوي
واتمنى اشوفك ..
ما انا وقت شوفك برتوي
وبدوب حنين ..
وانا في انتظارك ..
حبات عرق متجمعة فوق الجبين
وتسيل على جفوني اغمض
واشوفني حاسس بيكي اعيش
وياخدني احساسي وافضفض
وبحس روح الفرحة في
جلسة مساج
مستسلمة
لإيدين بتدعك حزنها
وتضيق على الآهة الخناق
فامتلاقيش
مكان ترجرج نفسها
واحسن لها ..
تتلم وتسيب البدن ..
وتحس نسمات الربيع
متمركزة
حواليك
وليها انت الوطن ..
برغم احساس الحرارة
ودوشة الباعة اللي مش
بيهدوا لثواني ..
بحسني – جوه مني الاوبرا –
وواصلني الأغاني ..
والقاني من غير صوت
بنادي الحب
واتكلم عليه ..
وبليغ بيسألني بأسى
و يقولي: قولي حب إيه؟
الحب مش كلمة في طرب
ولا عادة ورثها العرب ..
الحب أشبه بالنخيل
جميل ولو
مفهوش رطب ..
الحب ضلايا في حرارة
وطعمه بيحلي المرارة
وضوء نجوم
راحة وهدوء
صحيان ونوم ..
الحب هو اللي وقفني انتظر
راضي ماقولشي
كان وليه وازاي ..
وعينيا رايحة مع اللي رايح
راجعة تاني مع اللي جاي ..
شايفة الحقايق من زوايا
مجمعاها على المدى
ومسقسقاها في مج شاي
وسيجارة بتعلي المزاج ..
دخانها يكتب في انتظارك
قلبي دارك
وبقضي يومي استنظرك
واقف هناك
وارفع عينيا لفوق ساعات
علشان ما اشوف ضي القمر
هالل من الشباك.
