![](https://azharalharf.com/wp-content/uploads/2021/11/received_383717950202373-651x1024.jpeg)
شو بتِشبَهَك لِ فْصول!
ياسمينَك لْ زَهّر على جبينَك
عَطَّر نَسايِم روح بالوادي…
غار النِّدي غَنَّج تَكاوينَك
وشَهد العَسَل حلّيْت بِزيادِة!
ضاعِت قوافي بالعِطر، وزهور
تِتغَنّج ويِتمايَلوا القَصبات!
داخ الحَجَر وتنهّدِت لِ صخور
لما مَرَق طَيْفَك سِقي الحَقلات…
شو بتِشبَه طْياف الخريف رفوف،
ودَعسات هَمسَك تِلمُس وْراقو!
يْعلّم دَفا بَردُو عَ شال الصّوف،
تْضُمّك عَبايِة ضلوعها اشْتاقو!
شو بتِشبَهَك لِ فْصول والأيام!
غادي الْخريف يْغِلّ بِ عِبَّك…
غَمرِة دَفا تْخلّي الرّبيع حرام،
والشتي نْ صَيَّف ما رَح يِنلام
مْصَيّف قَمح لِ حقول بِقَلبَك!
زينة شعاع 💕🌸🍂🌿
خاصية التعليق غير مفعلة - يمكنك المشاركة على مواقع التواصل الاجتماعي