شو بتشبهك ل فصول!

شو بتِشبَهَك لِ فْصول!

ياسمينَك لْ زَهّر على جبينَك
عَطَّر نَسايِم روح بالوادي…
غار النِّدي غَنَّج تَكاوينَك
وشَهد العَسَل حلّيْت بِزيادِة!

ضاعِت قوافي بالعِطر، وزهور
تِتغَنّج ويِتمايَلوا القَصبات!
داخ الحَجَر وتنهّدِت لِ صخور
لما مَرَق طَيْفَك سِقي الحَقلات…

شو بتِشبَه طْياف الخريف رفوف،
ودَعسات هَمسَك تِلمُس وْراقو!
يْعلّم دَفا بَردُو عَ شال الصّوف،
تْضُمّك عَبايِة ضلوعها اشْتاقو!

شو بتِشبَهَك لِ فْصول والأيام!
غادي الْخريف يْغِلّ بِ عِبَّك…
غَمرِة دَفا تْخلّي الرّبيع حرام،
والشتي نْ صَيَّف ما رَح يِنلام
مْصَيّف قَمح لِ حقول بِقَلبَك!

زينة شعاع 💕🌸🍂🌿