هلاوس كبار
كتب / فرج احمد فرج
اشرقت الشمس بنور ربها في اجواء معتدلة ورائعة في جلسة الصباح ومتابعة الطيور المبتهجة علي اغصان الشجر في حديقتي ومتابعة تفتح الزهور في هذا الفصل وتناثر حبوب اللقاح التي تزكم الانوف وتهيج الحساسية .
اتصلت بصديقي الصدوق اطمئن عليه فاحواله هذه الايام لا تسر عدو ولاحبيب واعتزل والتزم البيت مع تغير احواله وتصرفاته ، رنيت عليه وانتظرت الرد ، وصبرت لاني اعرف انه اصبح كسول وبقي يخاف من رنة التليفون .
واخذ وقته ومع الالحاح وبعد ان تاكد من اسمي وصورتي علي شاشته ..
قام بالرد الحمد لله انك اتصلت بي .. انا عايزك ضروري .
قلت له … خير يا عمده .
رد عليا بصوت خفيض مع صمت قليل وكانه يتلفت حوله وهو يحدثني .
انت بخير .. ردعليا بعصبية الحمدلله .
انا عايز اشوفك .. يعني انت بخير .. اجيب لك معايا حاجة وانا جي .
اشتري لي عيش بلدي من الفرن اللي علي ناصية شارعك .
ساكون عندك بعد ساعة زمان وقبيل الظهيرة كنت عنده .. ظللت ادوس علي زر الجرس كي يفتح .. لم يفتح الا بعد ان تاكد مني جيدا .
وبمجرد ما دخلت اشاح بيدة تعالي نجلس في المكتب –
ليه هنا المكان كويس .
انت جايب معاك ايه .. قبل ما اجاوبك خضتني عليك ما انت كويس اهو وزي الفل ماشاء الله
بادرني .. لا انا مش كويس !
حيرتني – تعالي نفطر معا .. انت فطرت .. انا جايب لك شوية طعمية سخنة بالشطة وكمان شوية فول حكاية ووصيت الواد بتاع الفرن يسوي لك العيس المفقع .
اشاح بيده وهو يتحرك ويتلفت .. انا مش عايز اكل
بلاش اكل .. طيب اعمل لك معايا قهوة
عندك كل حاجة في المطبخ وعندك مجات
فين البن يا عمده ؟
في العلبة الصفيح اللي غطاها شفاف ..
عايزها بسكر ولا من غير – من غير ياسيدي
ماشي !
طيب اعملها في كوبية ولا مج ؟
خلصنا في اي حاجة!
احط لك عليها لبن ولا .. ؟
ولم اكمل اسئلتي
الا وبادرني ايه الغلاسة دي .!
هو انت ما بتنساش الالمان ابدا – قلت هما لما تطلب منهم حاجة لازم تكون مواصفاتك كاملة والا..هو غير مسئول عن جهلك
اصطبحنا واصطبح الملك لله .. انت جي تشتمني
تعالي .. تعالي اشرب القهوة – انا بهزر معاك !
واعتدل واقترب مني وهو يرشف القهوة بالبن ..
حتصدقني ؟
انت عارف طول عمري معاك بصدقك ..
نظر يمينا ويسارا وبصوت كالهمس .. فجر معلومة وقال انا في حد بيراقبني .
في البداية كنت حاضحك ..
فانتبهت انه بيتكلم بجد وبادرني قبل ما يتكلم .. انت حتصدقني !
وبنفس همسه قلت له ومين اللي بيراقبك وبيتجسس عليك .
صرخ في وجهي .. امال انا جايبك لية؟
طيب يا عم بالراحة عليا
احكي لي .. قال لي يا ابو محمد الامور معايا ما بقتش اسمعهم بس بل وصلت الامور عندي اني بدات اشعر بحاجات غريبة وكأن احد بيلمسني او مر من جانبي وكل ما انظر اليه يختفي
انت بتتكلم بجد يا عمده ..
ما انا قلت لك من زمان بعد ما مراتك وفاها الله ان تتزوج .. واهي تبقي جنبك تونسك.
وبغيظ شديد رد عليا .. حتبتدي بقي .. انا بقولك ايه .. وانت بتودينا فين !
استهنت به هو انت عندك حاجة علشان حد يتجسس عليك ده انت يادوب علي فيض الكريم ده يا دوب معاشك بيغطي الدواء .
وكام قرشين بتديهم لابنك .. صمت برهة ما هي دي!
وهذا بيت القصيد واصل الحكاية .
حكاية ايه ؟
الواد مراته سابت له البيت والعيال وراحت اسكندرية لاهلها .. وكل ده بسببي علشان بيجي يزورني من وقت للثاني وكل ما يطلب منها تيجي معه .. ترفض !
وانا لا املك اقوله ..غير العتبة .. انت تقصد وتعتقد انها وراء كل اللي بيحصل لك ده ..
سكت برهة وبمنتهي العقل والرصانة ..
نعم !
طلبت منه كي اغير الموضوع – اسمع انا رايح اسكندرية بعد كام يوم ومعايا تذكرتين للاوبرا حفل احياء ذكري عبد الحليم حافظ .. وانا في نفسي كنت احدثه ان يزور بيت اهل زوجة ابنه ويطيب خاطرها كي تعود معه لبيتها .
وبدانا نهزر ونجتر ايام زمان والقصص التي كل مره نحكيها وكأن الزمن قد توقف عندها وعندنا معا .
وبعد ايام اخطرني انه سيبيع الشقة وسينتقل لمكان بعيد واعطي مبلغ كبير لابنه – ولم تمضي شهور قليلة كنت اصلي عليه .. صلاة الجنازة.
