زينة شعاع /القلب خربه

القلب…. خِربِه…

عا بْواب قلبي مخَشَّبِه العَتْبِه!
مَيِّل عليها خَطِّط سْطورَك…

شو تْشرَّبُوا النّهدات بالتِّربِه،
وأشواك تِغرز قَسْوِة غْرورَك…

مَرِّق صابيعَك، عَيِّش الخِربِه،
طَرّي هَوَى النَّبْضات بِعطورَك!

شو تْعَنْكْبِت عا هَجْرَك الغُربِه!
لا بْتِنكفي عن طبعَك السّلبي،
ولا بْتُوصَل الأشواق لَقْصورَك!

شَيِّك عا ماضي الحُب بالعِلبِه
المْغَبَّرَه اللي بْقلب جارورَك…

غَبرا اللي غَطِّت أنسِجِة قلبي
صَعبِه الكثافِه يِخترِق نورَك!
بْتِشقَع أنين وْحِزن عا دربي،
وتِتْغَرّب بألحانها طيورَك!

من دونَك الأيام شو صعبِه،
والقلب عم بيحنّ لمرورَك!

بْصَلّي عا مذبَح نيّتَك طِلبِه،
وبِدعي حَنين الحُبّ تا يْزورَك،
ونِغرَق سوا عشّاق بِبْحورَك…

زينة شعاع